— उदय प्रकाश
तिब्बतबाट आएका
लामाहरु घुमी बस्छन्
आजभोलि मन्त्र फत्फताउँदै ।
उनका खच्चरका हूल
बगैँचामा पस्छन्
सयपत्री फूलका बोट चर्दैनन् ।
सयपत्रीको एक फूलमा
कति फूलहरु हुन्छन्
बाबा ?
तिब्बतमा वर्षा
जब हुन्छ
तब हामी कुन मौसममा
हुन्छौँ ?
तिब्बतमा जब तीन बज्छ
तब हामी कुन समयमा
हुन्छौँ ?
तिब्बतमा
सयपत्रीका फूलहरु हुन्छन्
के बाबा ?
लामाहरुले शंख बजाउँछन् बाबा ?
बाबा लामाहरुलाई
कम्बल ओढेर
अँध्यारोमा
छिट्छिटो हिँडेका देख्नु भा’को छ
कहिल्यै ?
जब मान्छेहरु मर्छन
तब तिनका चिहान वरपर
शिर झुकाउँदै
उभिन्छन् लामाहरु
उनीहरु मन्त्र पढ्दैनन् ।
उनीहरु फुस्फुसाउँछन्.... तिब्बत
..तिब्बत...
तिब्बत – तिब्बत
... तिब्बत – तिब्बत – तिब्बत
तिब्बत – तिब्बत ..
... तिब्बत .....
.... तिब्बत – तिब्बत
तिब्बत ........
र रोई बस्छन्
रात रातभरि ।
के लामाहरु
हामी झैँ नै
रुन्छन् बाबा ?
No comments:
Post a Comment